ചൂണ്ടല്‍ ഗ്രാമം-ചരിത്രം

ചൂണ്ടല്‍ ഗ്രാമം

തൃശ്ശൂര്‍ ജില്ലയില്‍ തലപ്പിള്ളി താലുക്കില്‍ തൃശ്ശൂരില്‍ നിന്നും 21 കിലോമീറ്റര്‍ ദൂരെ ഗുരുവായൂരിനടുത്താണ് ചൂണ്ടല്‍ ഗ്രാമം . തൃശ്ശൂര്‍ - കോഴിക്കോട് സംസ്ഥാനപാത ഈ ഗ്രാമത്തിലൂടെ കടന്നുപോകുന്നു . കുന്നംകുളം , ഗുരുവായൂര്‍ നഗരങ്ങള്‍ അധികമകലെയല്ലാതെ സ്ഥിതി ചെയ്യുന്നു . ഇവിടെനിന്നും 5 കിലോമീറ്റര്‍ ദൂരത്ത് ഗുരുവായൂര്‍ റെയില്‍വേ സ്റ്റേഷന്‍ സ്ഥിതി ചെയ്യുന്നു . നാനാത്വത്തില്‍ ഏകത്വം വിളങ്ങുന്ന സുന്ദരഗ്രാമമാണ് ചൂണ്ടല്‍ ഗ്രാമം . വിവിധ മതക്കാരുടെ ദേവാലയങ്ങളും ധാരാളം വിദ്യാലയങ്ങളും ആസ്പത്രിയും വായനശ്ശാലയും സന്നദ്ധസംഘടനകളും എല്ലാം ഉള്ള വളരെ വികസിതമായ ഒരു ഗ്രാമമാണ് ചൂണ്ടല്‍ . ജാതിമതഭേദമില്ലാതെ കക്ഷിരാഷ്ട്രീയ വ്യത്യാസമില്ലാതെ പൊതുനന്മയ്ക്കായി എല്ലാവരും ഇവിടെ ഒത്തൊരുമിച്ച് പ്രവര്‍ത്തിക്കുന്നു.

നൂറ്റാണ്ടുകള്‍ക്കുമുമ്പ് വനപ്രദേശമായിരുന്നു ഇന്നത്തെ ചൂണ്ടല്‍ ഗ്രാമം എന്നാണ് പറയപ്പെടുന്നത് . മനുഷ്യവാസം ഇല്ലാതിരുന്ന ഇവിടെ ജന്മിത്തം നിലനിന്നിരുന്ന കാലത്ത് ജന്മിമാരാണ് (ബ്രാഹ്മണര്‍) കാടുവെട്ടിത്തെളിച്ച് വീട് പണിതത് . അവരെ സഹായിക്കാനായി ധാരാളം ജോലിക്കാരുമുണ്ടായിരുന്നു . അവര്‍ക്കു താമസിക്കാനായി വീടുകളുമുണ്ടായി . തായങ്കാവ് , മേലേക്കാവ് എന്നീ ക്ഷേത്രങ്ങളെ ചുറ്റിപ്പറ്റിയായിരുന്നു ആദ്യം ജനവാസമുണ്ടായിരുന്നത് . പിന്നീട് ചൂണ്ടല്‍ പാറപ്പുറം മഹാവിഷ്ണുക്ഷേത്രം , പറപ്പൂക്കാവ് ക്ഷേത്രം എന്നിവയും ഇവര്‍ കയ്യടക്കി . ക്ഷേത്രങ്ങളുടെ നടത്തിപ്പിനും മറ്റുമായി ബ്രാഹ്മണരേയും മറ്റു ജോലികള്‍ക്കായി മറ്റു ജാതിക്കാരേയും കൊണ്ടുവന്നു പാര്‍പ്പിച്ചു . ജന്മിമാര്‍ തമ്മില്‍ നടന്ന അധികാരവടംവലിയില്‍ ചില കുടുംബങ്ങള്‍ ഇല്ലാതാകുകയും ചെയ്തു. കാടുവെട്ടിത്തെളിച്ച് കൃഷിചെയ്യാന്‍ തുടങ്ങിയതോടെ കാട് ക്രമേണ നാടായി മാറുകയായിരുന്നു .അങ്ങനെ നൂറ്റാണ്ടുകള്‍ കൊണ്ടാണ് ചൂണ്ടല്‍ ഗ്രാമമായിത്തീര്‍ന്നത് . ഹിന്ദുക്കളും കൃസ്ത്യാനികളും മാത്രമേ ആദ്യം ഇവിടെയുണ്ടായിരുന്നുള്ളൂ . കൃസ്ത്യാനികള്‍ക്കായി ആദ്യം ദേവാലയമുണ്ടായിരുന്നില്ല . അവര്‍ മറ്റം പള്ളിയിലേയ്ക്കായിരുന്നു പോയിരുന്നത് . ആയിരത്തിത്തൊള്ളായിരാമാണ്ടിനുമുമ്പുതന്നെ ചൂണ്ടലില്‍ കൃസ്ത്യന്‍ പള്ളി സ്ഥാപിച്ചിരുന്നതായും എന്നാല്‍ അത് വളരെക്കാലം ആരാധനയൊന്നുമില്ലാതെ പൂട്ടിക്കിടക്കുകയായിരുന്നുവെന്നും പറയപ്പെടുന്നു . നാല്‍പതുവര്‍ഷത്തോളം പൂട്ടിക്കിടന്ന പള്ളി പിന്നീട് തുറന്നുപ്രവര്‍ത്തിച്ചു തുടങ്ങിയത് 1930ന് ശേഷമാണ്. പിന്നീടാണ് ആസ്പത്രി സ്ഥാപിക്കപ്പെട്ടത് .

ഇപ്പോള്‍ നഗരത്തിന്‍റെ എല്ലാ സൌകര്യങ്ങളും ഗ്രാമത്തിന്‍റെ പ്രശാന്തതയുമുള്ള ഗ്രാമമാണ് ചൂണ്ടല്‍. വിവിധ ജാതിമതങ്ങളില്‍ പെട്ടവരുണ്ട്. വിവിധ രാഷ്ട്രീയ കക്ഷികളില്‍ പെട്ടവരുണ്ട്. ഇവരെല്ലാം അവരുടെ വിശ്വാസങ്ങള്‍ വച്ചുപുലര്‍ത്തുകയും അതിനനുസരിച്ച് പ്രവര്‍ത്തിക്കുകയും ചെയ്യുന്നവരുമാണ് . എന്നാല്‍ ഇതിനെല്ലാമപ്പുറം സഹോദരഭാവത്തോടെയുള്ള സഹവര്‍ത്തിത്വം, ഒറ്റക്കെട്ടായി നാടിന്‍റെ നന്മയ്ക്കുവേണ്ടിയുള്ള പ്രവര്‍ത്തനം എന്നിവ ഇന്നാട്ടുകാരുടെ എടുത്തുപറയേണ്ട ഗുണങ്ങളാണ്. പെണ്കുട്ടികള്‍ക്കുമാത്രമായി കന്യാസ്ത്രികള്‍ നടത്തുന്ന സ്കൂള്‍ , ഹയര്‍ സെക്കന്‍ററി സ്കൂള്‍ ,സര്‍ക്കാര്‍ സ്കൂള്‍ , ആസ്പത്രി , ആയുര്‍വേദചികിത്സാകേന്ദ്രങ്ങള്‍ , വിവിധ മതസ്ഥര്‍ക്കായുള്ള ആരാധനാലയങ്ങള്‍ ,ചെറുകിട വ്യവസായ സ്ഥാപനങ്ങള്‍, അനേകം വ്യാപാര സ്ഥാപനങ്ങള്‍ എന്നിവയാല്‍ ധന്യമാണ് ഈ ഗ്രാമം . കുന്നുകളും തോടുകളും കുളങ്ങളും മൈദാനങ്ങളും വയലുകളും ചേര്‍ന്ന് ഗ്രാമീണ സൌന്ദര്യം വര്‍ണ്ണനാതീതമാക്കുന്നു .